வாழ்வதற்காக உண்கிறோம்.

ஜலதோஷமும்,சளிக்காய்ச்சலும் வராமல் தடுத்துக் கொள்ள இயற்கையான வழிமுறைகள் உள்ளன. அப்படியே இவை எட்டிப் பார்த்தாலும் உடனே தடுக்கும் ஆற்றல் கொண்ட சில உணவுகள் உள்ளன.

நச்சு நுண்மங்களையும், நோய் நுண்மங்களையும் உடலுக்குள் நுழைய விடாமல் தடுப்பதில் வெள்ளைப் பூண்டு முதலிடத்தில் இருக்கிறது. இதில் உள்ள அலிசின் என்ற பொருள் கல்லீரலை முழுமையாகத் தூய்மை செய்கிறது. இதன் மூலம் இரத்தமும் சுத்தமாக்கப்பட்டு வெள்ளை இரத்த அணுக்களை தொடர்ந்து உற்பத்தி செய்யத் தூண்டி விடப்படுகிறது. நாம் அறியாமல் சுத்தம் இல்லாத உணவுகளைச் சாப்பிட்டிருந்தாலும், குளிர்காலத்தில் ஜலதோஷம்,காய்ச்சல் தாக்காமல் இருக்கவும் காலையில் பூண்டுப்பற்களில் 5,6ஐ நல்லெண்ணெயில் வதக்கிச் சாப்பிட்டு வந்தால் போதும். உணவுகளில் பூண்டு சேர்த்து வந்தாலும் இப்படி தனியாகச் சாப்பிடுவது நல்லது.

அடுத்து இஞ்சி. உணவில் இஞ்சி சேர்த்துச் சமைப்பது. ஒரு வேளை சுக்கு காபி அருந்துவது. ஜலதோஷமும், சளிக்காய்ச்சலும் (FLU) இருந்தால் இரண்டு வேளை சுக்குக்காபி அருந்தி வர வேண்டும். இஞ்சியில் உள்ள உடனே ஆவியாகும் நறுமண எண்ணெய் வகைகள் உடலுக்கு வெப்பத்தையும் தந்து உடலை வியர்க்கச் செய்து காய்ச்சலையும்குணப்படுத்துகிறது. உடலில் உள்ள விஷப் பொருள்களையும் உடனே வெளியேற்றுகிறது. மேலும் நெஞ்சில் உள்ள சளியையும் வெளியேற்றி நுரையீரல்கள் நன்கு செயல்பட உதவுவதால் மூச்சு இரைப்பு குறைந்து நன்கு சுவாசிக்க முடியும். ஜீரண மண்டலத்தை சுத்தமாக வைத்துக் கொள்ளவும், உணவுகள் ஜீரணமாகவும் இஞ்சி சேர்த்து சமைத்த உணவுகளை ஒரு வேளையாவது உணவில் இடம் பெறுமாறு பார்த்துக் கொள்ள வேண்டும்.

குளிர்காலத்தில் தொண்டை வலியையும் குணப்படுத்தி உடலில் எரிச்சல் ஏற்படாமலும் தடுக்கிறது, தேன். இருமல் மருந்துகளை விட தேன் சிறப்பாகச் செயல்பட்டு தொற்று நோய், இருமல், சளி, ஆஸ்துமா, அலர்ஜி போன்றவற்றைத் தடுக்கிறது. தினமும் ஒரு தேக்கரண்டி அல்லது இரண்டு தேக்கரண்டி தேன் சளிக் காய்ச்சல் நேரத்தில் சாப்பிட்டு வந்தால் சளி முற்றிலும் நீர்த்துப் போகும்.

அடுத்து தயிர். உடலில் தீங்கு விளைவிக்கும் நோய் நுண்மங்கள் இருந்தால் கழுத்தைப் பிடித்துத் தள்ளுவது போல தயிரில் உள்ள அசிட்டோபிளஸ், ஃபிடஸ் என்ற இரு தோழமையுள்ள பாக்டீரியாக்கள் உள்ளன. ஜலதோஷமும், சளிக்காய்ச்சலும் குணமாகும்வரை இரண்டு கோப்பை தயிர் சாப்பிட்டு வரவும். நல்ல பாக்டீரியா சேர்த்த தயிர் இப்போது எங்கும் கிடைக்கிறது. வீட்டில் உறைய வைக்கும் தயிரும் நல்ல தயிரே.

ஒரு நாள் விட்டு ஒரு நாள் என அடர்த்தியான பச்சை நிறத்தில் உள்ள தண்டுக்கீரை, பசலைக்கீரை, முளைக்கீரை என ஏதாவது ஒருவகைக் கீரையை உணவில் சேர்த்து வரவும். இவை மகா ஆற்றலுடன் ஜலதோஷம், சளி, காய்ச்சல் போன்றவற்றை உண்டாக்கும் நோய் நுண்மங்களை அழித்து உடல்நலத்தைப் புதுப்பிக்கின்றன.

குளிர்காலத்திலும், ஜலதோஷம், சளிக்காய்ச்சல், மற்றும் பிற உடல் நலப்பிரச்னைகள் இருக்கும்போதும் தினமும் ஓர் எலுமிச்சைப் பிழிந்து அதில் சுடுதண்ணீர் ஒரு டம்ளர், ஒரு சிட்டிகை உப்பு சேர்த்து காலையில் அருந்தி விடவும். காரணம், இதில் உள்ள சிட்ரிக் அமிலம் உடலில் கலப்பதால், இரத்தத்தில் உள்ள காரச்சத்து (Alkaline) கூடுகிறது. இதனால் உடலில் இரசாயன மாற்றம் ஏற்பட்டு நோய்கள் உடனே குணமாகின்றன. மேலும் பழத்தில் உள்ள வைட்டமின் சி நோய்க் கிருமிகளை விரைந்து அழிக்கும் தன்மை கொண்டதாகும்.

இதனால் ஜலதோஷம்,சளிக்காய்ச்சல் இன்றி ஆண்டு முழுவதும் நலமுடன் வாலூம்.

கொழுத்த சரீரம் கொண்ட பெண்கள் கருத்தரிக்க இயலாமல் போவது உண்டு. இவர்கள் முதல் கட்டமாக தினமும் பத்து சிறிய வெங்காயத்தை உரித்துச் சாப்பிட்டு வரவேண்டும். இவற்றை வெறும் வயிற்றில் சாப்பிடலாம் அல்லது தயிரில் போட்டுத் தயிர் பச்சடியாக காலை அல்லது பகல் உணவுடன் சேர்த்தும் சாப்பிடலாம். வெங்காயம் சாப்பிடுவதுதான் மிகவும் முக்கியம்.

மேலும், காராமணி, கொண்டைக் கடலை, பாசிப்பருப்பு, பசலைக்கீரை, நல்லெண்ணெய், ஆட்டு ஈரல், முட்டை இவற்றுள் மூன்றையாவது கரு உருவாகி குழந்தை பிறக்கும் வரை தினசரி பெண்கள் சாப்பிட்டு வரவேண்டும். காரணம், இவற்றில் தாராளமாக உள்ள ஃபோலிக் அமிலம் கரு உருவாகவும், ஆரோக்கியமாக வளரவும் பெரிய அளவில் உதவி செய்கிறது. குறிப்பாக, தினமும் 50 கிராம் காராமணிச் சுண்டல் சாப்பிட்டு வருவது நல்லது. பெண்களின் இரத்த சோகை குணமாகி உடலின் ஒவ்வொரு செல்லிலும் சிவப்பு இரத்த அணுக்கள் இருப்பதால் கண்டிப்பாக கரு உருவாகி விடும்.

மனைவி மட்டுமல்ல. கணவனும் வெங்காய மருத்துவத்தையும் ஃபோலிக் அமிலம் உள்ள உணவுகளையும் தொடர்ந்து சாப்பிட்டு வரவேண்டும். மேலும் மாத விலக்கு வந்து முடிந்த பத்தாவது நாள் முதல் அடுத்த பதினான்கு நாட்கள் கருத்தரிக்க உகந்த நாட்கள் என்பதையும் அறிந்து வைத்திருப்பது நல்லது.

உணவே மருந்து:

கொண்டைக் கடலை, சுண்டல், குழம்பு போன்றவற்றில் சீரகத் தூளையும் சேர்த்து சமைத்தால் உடனுக்குடன் உணவு ஜீரணமாகிவிடும்.

ஞாபகசக்தி அதிகரிக்க...

கைக்குத்தல் அரிசி, சம்பா, ரவை, தவிடு சலிக்காத கோதுமை மாவில் சப்பாத்தி, கேழ்வரகு, கம்பு, போன்றவை இடம்பெற வேண்டும். எந்த வேளை உணவிலும் இவற்றில் ஒன்றாவது இடம்பெற வேண்டும்.

உலர் திரட்சை, நெல்லிக்காய், ஆப்பிள், பாதாம்பருப்பு இவற்றுடன் ஒரு வேளை காய்கறி சாலட், இரண்டு வேளை பழசாலட் என்று சாப்பிட்டு வந்தால் ஞாபகசக்தி விழிப்பாக இருக்கும்.

மிக எளிய வழி, ஏழு பாதாம் பருப்புகளை ஒரு கிண்ணத்தில் இரவு ஊறப்போடவும். காலையில் எழுந்ததும் பல் சுத்தம் செய்த பிறகு ஏழு பருப்புகளையும் தோலை நீக்காமல் மென்று சாப்பிட்டு வரவும்.

கலோரி குறைவான சில உணவுகள்:

ஏழைகளின் எளிய உணவாக அவரைக்காய், மொச்சை போன்றவை போற்றப்படுகின்றன. அதே நேரத்தில் கொழுப்பு குறைவு, நார்ச்சத்து அதிகம், தனிச்சிறப்பு வாய்ந்த புரதச் சத்து, வாரத்திற்கு இரண்டு வேளைகள் சாப்பிட்டால் கூடப் போதுமானது. குறைவான கலோரி என்பதால் எடையும் கட்டுப்பாட்டில் இருக்கும். பச்சைப் பட்டாணி, பீன்ஸ், காராமணி போன்றவற்றை மற்ற நாட்களில் பயன்படுத்தலாம்.

நீலம் மற்றும் பச்சை நிறத்தில் உள்ள கத்தரிக்காய் மூளைக்கும், தசைக்கும் பெரிய அளவில் நன்மை செய்கிறது. எனவே, கத்தரிக்காயை ருசியாக சமைத்து அடிக்கடி உணவில் சேர்க்கவும். சத்துஉணவு நிரம்பியது இக்காய் ஆழ்ந்த தூக்கத்திற்கும் கத்தரிக்காய் உதவும்.

ஊனம் இல்லாத குழந்தைகள் பிறக்கவும், எலும்பு மண்டலம் உறுதியாக இருக்கவும் ப்ராக்கோலி உதவுகிறது. காய்கறிகளுள் மிக உயர்தர இரும்புச் சத்து இதில் தான் இருக்கிறது.

கைத்குத்தல் அரிசியை விட இருமடங்கு புரதச்சத்து உள்ள உணவு, ஓட்ஸ் ஆகும். நார்ச்சத்தும் கெட்டியான மாவுச் சத்தும் உள்ள உடனடியாகக் கிடைக்கும் சிறந்த உணவு ஓட்ஸ். சப்பாத்தி, சாதம் தயாரிக்கும்போது ஓட்ஸையும் கலந்து தயாரித்தால் உடல் எடையும் கட்டுப்பாட்டில் இருக்கும்.

வாரம் ஒரு நாள் பரங்கிக்காய் உண்டால் தினமும் உங்கள் இளமைத் துடிப்பை எந்த ஒரு சக்தியாலும் கொள்ளையடிக்க முடியாது. நம்முடைய உடலுக்கு அதிக அளவு கரோட்டீனாய்டு தேவை. எனவே, கரோட்டீனாய்டு சத்து உடலில் அதிகமாக இருந்தால் உங்கள் உடல் முதுமையடைவது தாமதப்படுத்தப்படுகிறது. அந்த அளவிற்கு கரோட்டீனாய்டு சத்து அதிகமுள்ள முதல் உணவு பரங்கிக்காய்தான். எல்லாவிதமான காய்கறிகளுடனும் பரங்கிக்காயைச் சேர்த்து சமைக்கலாம். கூடவே ஏதேனும் பருப்பு வகை ஒன்றும் சேரவேண்டும். பரங்கி விதைகளும் சாப்பிடலாம்.

மேற்கண்ட கலோரி குறைவான உணவுகள் அனைத்தும் உடல் எடை அதிகரிக்காமலும் கண்டிப்புடன் பார்த்துக் கொள்கின்றன என்பது குறிப்பிடத்தக்கது.

நீண்ட நாட்கள் வாழ விரும்புகிறவர்களுக்கு உண்மையிலேயே மருத்துவக் குணங்கள் நிரம்பிய மருந்துகள் போல செயல்படும் சில நல்ல உணவுகளை தி அமெரிக்கன் ஜார்னல் ஆஃப் கார்டியலாஜி பட்டியலிட்டுள்ளது.

இந்த உணவுகள் இருதய நோய், புற்றுநோய், முதுமை அடைவதை தாமதப்படுத்துதல், வேறு ஏதேனும் நோய்கள் வந்தால் தனிச்சிறப்புடன் செயல்பட்டு அவற்றைக் குணமாக்குதல் ஆகிய பண்புகளுடன் செயல்படுகின்றன.

முதல் உணவு, பரங்கிக்காய்தான். பரங்கிக்காய், செல்கள் முதுமை அடையாமல் பாதுகாக்கின்றன. புற்றுநோய், இதயநோய் வளர்ச்சியடையாமல் தடுத்துக் குணப்படுத்த இதில் பீட்டாகரோட்டீன் தாராளமாக உள்ளது. கலோரி, கொழுப்பு, சோடியம் உப்பு போன்றவை இதில் குறைவாக உள்ளன. நார்ச்சத்துகள் தாராளமாக உள்ளன. பரங்கி விதையில் மக்னீசியம், இரும்புச் சத்து ஆகியவற்றுடன் புரதச் சத்தும் நன்கு கலந்து உள்ளன.

இரண்டாவது நஞ்சை முறிக்கும் சக்தி நிறைந்த பழம், மாதுளை. உடலில் உள்ள கட்டி, வீக்கம், அழற்சி போன்றவற்றை மாதுளம் பழச்சாறு குணமாக்குகிறது. பிராஸ்டேட் சுரப்பியில் புற்றுநோய் வந்துவிட்டாலும் தடுக்கிறது. இதயத்திற்கும், மூளைக்கும் நன்கு இரத்தம் கிடைக்கவும் உதவுவதால் தேவையான ஆக்ஸிஜன் உடலுக்கு நன்கு கிடைத்து விடுகிறது. எனவே இளமைத் துடிப்புடன் இதய நோயின்றி வாழலாம். இயன்றபோதெல்லாம் மாதுளம் பழம் சாப்பிடவும். சாறாகவும் அருந்தலாம்.

மூன்றாவதாக லைகோபைன் என்ற ஆன்ட்டி-ஆக்ஸிடென்ட் நிறைந்த தக்காளி. இதைச் சமைத்துச் சாப்பிடுவதே நல்லது. நுரையீரல் புற்றுநோய், பிராஸ்டேட் சுரப்பி, மார்பகம் போன்ற உறுப்புகளில் புற்று நோய் தாக்காமல் இந்த லைகோபென் பாதுகாக்கிறது. 3 முதல் 6 தக்காளிப் பழங்களை சாறாக அல்லது சாலட்டாக சேர்த்துக் கொள்ளவும். உடல் பருமனையும், அதிகப் பசியையும் தக்காளி குறைக்கிறது.

நான்காவதாக, வரமிளகாய்த் துவையல். ஆரஞ்சுப் பழத்தில் உள்ளதைவிட மூன்று மடங்கு அதிகமாக வைட்டமின் சி நிறைந்தது. கண்களைப் பாதுகாக்கும். பீட்டா கரோட்டீனும் தாராளமாக இருக்கிறது. உடலில் நோய் எதிர்ப்புச் சக்தியை அதிகரிக்கும். அதிசய மருந்து சிவப்பு மிளகாய். காரக்குழம்பும் நல்லதே.

ஐந்தாவதாக இஞ்சி சேர்த்த தேங்காய் சட்னி, சமையல், சுக்கு தேநீர் என்று இஞ்சியையும் சேர்த்து வரவும். இஞ்சியில் உள்ள ஜிஞ்சரோல் என்ற கூட்டுப்பொருள் இரத்தக் கொதிப்பு, ஒற்றைத் தலைவலி, மூட்டு வலி போன்றவற்றைக் குணமாக்குவதுடன் இரத்த ஓட்டம் சீராக இருக்கவும் உதவுகிறது. தாம்பத்யத்தில் ஆர்வம், மலட்டுத் தன்மையைக் குணமாக்குதல், மூளையை விழிப்புடன் வைத்திருத்தல் இஞ்சியின் சிறப்பம்சங்களாகும்.

ஆறாவதாக, பசலைக் கீரை உட்பட அடர்நிறத்தில் உள்ள தண்டுக்கீரை, புதினாக்கீரை போன்றவற்றை உணவில் சேர்க்கவும். ஒரு நாள்விட்டு ஒரு நாள் அவித்த பசலைக் கீரையை உணவில் சேர்த்து வரவும். இதனால் வயதாக வயதாக பார்வை மங்குதல், காட்ராக்ட் போன்ற பிரச்னைகளை பசலைக் கீரையில் உள்ள லுட்டைன் (LUTIEN) பாதுகாத்து பார்வைத் திறனை அதிகரிக்கிறது. மேலும் ஆன்ட்டிஆக்ஸிடென்ட்டுகளான வைட்டமின் ஏ, சி, ஈ போன்றவற்றுடன் ஃபோலேட்டும் நிரம்பி வழிகிறது. உறுதியான எலும்பிற்குத் தேவையான கால்சியம், தசை அணுக்களின் ஆரோக்கியத்திற்கான மக்னீசியமும் இந்தக் கீரையில் நிரம்பி வழிகின்றன. பருப்பு, தேங்காய் போன்றவை சேர்த்து பசலைக் கீரையை சமைக்கவும்.

மேற்கண்ட ஆறு உணவுகளில் ஐந்து உணவுகளாவது உணவில் சேர்த்து வந்தால் உங்களை அறியாமலேயே நோய்களிலிருந்தும் முதுமை அடைவதில் இருந்தும் மீண்டு நீண்ட நாள் வாழ்வீர்கள். மற்றவற்றைத் தவிர்த்தாலும் மாதுளம் பழம், பரங்கிவிதைகள், தக்காளி இந்த மூன்றையாவது தினமும் தவறவிடாது சேர்த்து வாருங்கள். வாழ்நாள் முழுநலத்துடனேயே இதனால் அதிகரிக்கும்.